भैरहवालाई हराउँदै पोखरा फाइनलमा, उपाधिका लागि चितवनसँग
काठमाडौं २०७८ असोज २१
पोखरा राइनोज बजाज पल्सर एभरेष्ट प्रिमियर लिग (ईपीएल) २०२१ को फाईनलमा प्रवेश गरेको छ।
बिहीबार भएको दोस्रो क्वालिफायरमा भैरहवा ग्लाडिएटर्सलाई ७ विकेटले पराजित गर्दै पोखरा राइनोज पहिलो पटक ईपीएलको फाईनल पुगेको हो । दोस्रो र तेस्रो संस्करणको उपविजेता भैरहवा भने बाहिरिएको छ। भैरहवाले दिएको १२० रनको लक्ष्य पोखराले १८.२ ओभरमा ३ विकेट गुमाएर १२३ रन बनाउँदै पूरा गर्यो। पोखराको जितमा साहान अराचचिगेले अर्धशतक बनाउनुभएको हो ।
३५ रनमा ३ विकेट गुमाएको पोखराका लागि साहान अराचचिगे र विपिन रावलले अविजित ८८ रनको साझेदारी गर्दै जित दिलाउनुभयो । साहानले ४४ बल खेल्दै ७ चौका मद्दतमा अविजित ५३ रन बनाउनुभयो । विपिनले ३४ बलमा ३ चौका र १ छक्का मद्दतमा अविजित ४० रन बनाउनुभएको हो।
आठौ ओभरमा भैरहवाका भुवन कार्कीले रित गौतम र लोकश बमलाई आउट गर्दै भैरहवालाई खेलमा फर्काउने प्रयास गर्नुभएको थियो । तर साहान र विपिनले सम्हालिएर ब्याटिङ गरेपछि पोखराले खेल जित्यो। पोखराले अब शनिबार उपाधिका लागि चितवन टाईगर्ससंग खेल्नेछ । पहिलो क्वालिफायरमा पोखरालाई नै हराएर चितवन फाईनल पुगिसकेको छ ।
भैरहवाका भुवन कार्कीले ३ ओभरमा १ मेडन राख्दै १६ रन खर्चेर २ विकेट लिए । टीयू मैदानमा टस हारेर पहिले ब्याटिङ गरेको भैरहवाले २० ओभरमा ६ विकेट गुमाएर ११९ रन बनाएको थियो।
2026-01-13-12-03-22.jpeg)
तपाईको प्रतिक्रिया